جدید پنجابی سرائیکی شاعری
ایں واری میں سوچیا ہا جو دِھی دا ٹِکا گھنساں
ڈھولناں بنسی بھورل دا تے سر دا پٹکا گھنساں
کجھ تاں سکھا ساوہ تھیساں کجھ تاں بار لہیساں
کجھ میں فرض کریساں پورے کجھ ادھار لہیساں
کیا پتہ ہا ملک دے تاجر میڈی رت اچ دھانسن
سبھے ہکو ایکا کر تے میڈے ماس کوں کھاسن
اے تاں عمرے کر تے ولسن متھے آپ ڈنھبیسن
اپنیں گل وچ مالا پیسن لاشاں ساڈیاں چیسن
اے تاں وڈے قرضے گھندن وڈے معاف کریندن
اپنیاں آپ اپیلاں سنڑدن، خود انصاف کریندن
میں ڈُکھاں دی تاپش دے وچ رادھم اپنیاں فصلاں
رت تے پگھر میڈا وھ گے نہ ہن سوکھیاں نسلاں
ایں دھرتی دے سینے آتوں ہر ہک بوٹا پُٹو
سبھے افسر رل تے ہن تاں ساڈیاں قبراں کُھٹو
جہانگیر مخلص
No comments:
Post a Comment
Note: only a member of this blog may post a comment.