جدید پنجابی سرائیکی شاعری
ہجر دا شہر دردیں دا جہاں جانڑے تے میں جانڑاں
محبت امتحان اے امتحاں جانڑے تے میں جانڑاں
میں سب کجھ جانڑ کیں انڑ جانڑ تھی باہنداں تاں کیوں آخر
میڈی چپ دی وجہ کوئی میں جیہاں جانڑے تے میں جانڑاں
توں ہک واری زباں دے نال اپنڑاں آکھ ڈے میکوں
پچھیں سارے زمانے دی زباں جانڑے تے میں جانڑاں
اساں ہک بئے دے واقف ہیں وڈا گہرا تعلق ہے
کلیھپے کوں میڈا خالی مکاں جانڑے تے میں جانڑاں
میں اپنڑے ہاں دے ہیٹھو اپنڑے بالیں دا دفاع کرنڑے
غضب دے وا ڈوا جھڑ آشیاں جانڑے تے میں جانڑاں
مسافر ہاں میکوں محسن میڈی منزل دا ناں ڈس ڈے
ولا منزل تے رستے دا نشاں جانڑے تے میں جانڑاں
طارق محسن قیصرانی
No comments:
Post a Comment
Note: only a member of this blog may post a comment.