جدید پنجابی شاعری
جہڑی سوچ دی لوڑ سی سانوں اوہدا کال اے چاچا
تاں تے ساڈا ڈنگراں توں وی بھیڑا حال اے چاچا
مینوں تُوں ایہہ سوچ کے دس ہاں اپنے دیس دے اندر
بے وَسّیاں تے بے حِسّیاں نوں کِتواں سال اے چاچا
جُیوں جمے آں سہندے پئے نیں ماڑے ای دُکھ سارے
اپنے پِنڈ تے رب وی خورے تگڑے نال اے چاچا
مینوں چُپ کرا دیندے نیں اوہنوں کُجھ نہیں کہندے
اوہ تگڑے دا پُتر وی تے کل دا بال اے چاچا
گھر گھر لگی اِٹ تے جے مزدور دا لہو نہیں لگیا
مینوں وی فیر دس کھاں ایہدا رنگ کیوں لال اے چاچا
ہُن وی جے نہ لوکیں بدلے تے فیر ایس توں اگے
سِدھی ساہویں انھے کھوہ وچ انھی چھال اے چاچا
جہڑے باغ نوں لاندے رہ گئے توتے مور تے چِڑیاں
گِرجھاں تے کُجھ کاواں رل کے دِتا گال اے چاچا
نِت گلی چوں لنگھدا اے جو واء دے بُلّے ورگا
باقی دا توں چھڈ پر اوہدی ٹور کمال اے چاچا
سندھو اِکو گل پُچھدا اے دور کرن وچ سانوں
بندے ہُن تک سمجھے کیوں نہیں کِہندی چال اے چاچا
ارشاد سندھو
No comments:
Post a Comment
Note: only a member of this blog may post a comment.