جدید پنجابی شاعری
بنام امیدوار
گل سُن بھائیا ووٹاں منگن
اینی لمبی گڈی تے نہ آیا کر
وڈے ببر شیر دے ورگا منہ گڈی دا
انج لگدا اے کھا جاوے گا
ساڈی ہر اک آس تے سُفنا
ساڈے پِنڈ دیاں ماٹھیاں گلیاں
تیرے تھلے اُچیاں گڈیاں
اسیں مہاتڑ بھولے بھالے
توں چھڈنا ایں وڈیاں وڈیاں
تیرے پیر ہوا وچ اُڈدے
ساڈیاں نال زمین دے اڈیاں
تیری یاری انبراں نال اے
ساڈی جُڑت اے دھرتی نال
اسیں ادھار تے جیون والے
تُوں ایں بھائیا مال و مال
تیری گڈی نالے گڈی وچوں لہندے
لم سلمے موٹے تازے گبھرو
تے بندوقاں ویکھ کے
ڈر جاندے نیں پِنڈ دے بال
گل سُن بھائیا ووٹاں منگن
اینی لمبی گڈی تے نہ آیا کر
وڈے ببر شیر دے ورگا منہ گڈی دا
انج لگدا اے کھا جاوے گا
ساڈی ہر اک آس تے سُفنا
احمد نعیم ارشد
No comments:
Post a Comment
Note: only a member of this blog may post a comment.