جدید پنجابی سرائیکی شاعری
تیکوں یاد کریجے اوں ویلھے
تیکوں یاد کریجے اوں ویلھے جڈاں بیریں بور توں جھر ہوون
جڈاں ساول پیر دھگیرے چا جڈاں سرمی ہووے جوبن تیں
سرمی دے نازک پھلاں تیں میڈا یار اسور دے ویلھے کوں
جڈاں شبنم کردی پئی ہووے
جڈاں کالی رات دے سینے تیں کوئی چاندنی ٹُردی پئی ہووے
جڈاں پیلوں پک کے لال ہوون جڈاں پیلوں چُنڑدے بال ہوون
جڈاں کانے بھلر چائے ہوون جڈاں طار واہیرے تھئے ہوون
جڈاں ساونڑ دے سکراند لگے جڈاں بدلاں دا گجکار ہووے
جڈاں وسدے مینہ وچ اڈدے ہوئے کجھ کاواں دا کرکار ہووے
جڈاں چردے مال دے ٹلیاں دا کاہیں دے وچ کھڑکار ہووے
جڈاں ٹالھیں ہیٹھ نماشاں کوں چن چیڑیاں دا چلکار ہووے
جڈاں گیرے گھوکدے پئے ہوون جڈاں خمرے مست الست ہوون
جڈاں کونجاں فجر کوں تلھڑ دی ترمدی ہوئی تریڑ تیں باہندے ہوئے
ایویں پھولے پھولے پیر رکھن جیویں خواب اکھیں وچ ٹُردا ہے
جڈاں بلبل اپنڑے آلھڑیں کوں پھل پتیاں لاونڑ آئی ہووے
جڈاں ساوے ونڑ دی ساول تے کوئی کوئل گاونڑ آئی ہووے
جڈاں پھل دے پاک کٹورے چوں دُھپ شبنم چاونڑ آئی ہووے
تیکوں یاد کریجے اوں ویلھے ۔۔۔۔۔۔
صفدر کربلائی
No comments:
Post a Comment
Note: only a member of this blog may post a comment.