وت کلھپ دی کربلا ہے میں ہمی

 جدید پنجابی سرائیکی شاعری

وت کلھپ دی کربلا ہے، میں ہمی

موُنجھ ہے تیڈی خُدا ہے، میں ہمی

تاڑ کے شیشے دو اَج کیوں چھِرک پئیں

خیر ہئی کیا تھی گیا ہے، میں ہمی

سر تے سایۂ، وینڑ ناں دی ڈئینڑ دا

جِتھ وی روونڑ دا الا ہے، میں ہمی

کیا خبر اے عشق ہے یا کوئی سزا

چار پاسے بھا ہی بھا ہے، میں ہمی

نال ہاویں تاں، زمانہ نال ہا

ہنڑ تاں بس ہک میکدہ ہے، میں ہمی

دھڑکدے جیرھا او دل وچ توں ہویں

اے جیرھا رُلدا ودا ہے، میں ہِمی

توں گئیں تاں غم چدھاروں ویڑھ گئن

سئے بیماریاں ہن دوا ہے، میں ہمی

ساڈے غم دا توڑ صاحب توں ہِویں

غم کوں جئیں دا آسرا ہے، میں ہمی

صاحب لغاری