جدید پنجابی سرائیکی شاعری
میڈا دل نال کیا واسطے
دل تاں ہے دلربا واسطے
تیڈے رخ کوں جو مہ رخ ڈٹھم
چاندنی رات یاد آ گئی
دل دی ضد ہئی جو دور تک جلوں
اپڑیں اوقات یاد آ گئی
میڈا سئیں تھی خدا واسطے
دل تاں ہے دلربا واسطے
توں ہویں پھل چنبیلی دا پھل
میں ہمی خار ونڑ ونڑ دا خار
اینویں جذبات وچ آ کرائیں
کوئی تئیں وانگوں بے اعتبار
پیار دے ڈے گیا واسطے
دل تاں ہے دلربا واسطے
فیصلے ڈیکھ تقدیر دے
اپڑیں قسمت تے ہسدا وداں
توں توڑے چھوڑ گئیں جانیاں
میں ہمی جو ترسدا وداں
تیڈے سکھڑیں الا واسطے
دل تاں ہے دلربا واسطے
اینویں بے سرت ہن میڈے ساہ
جینویں فریاد سائل کرے
ہے تمنا جو ہک واری بس
خوبرو کوئی قائل کرے
دل کوں وت ہک دعا واسطے
دل تاں ہے دلربا واسطے
اے میڈے پیار دی شاعری
عکس تیڈیں ادائیں دا ہے
اے ثمر میکوں لگدے سجنڑ
ڈھیر ساریں دعائیں دا ہے
ہے دوا لا دوا واسطے
دل تاں ہے دلربا واسطے
شفقت بزدار
No comments:
Post a Comment
Note: only a member of this blog may post a comment.