جدید پنجابی سرائیکی شاعری
کیویں عید منانواں سانول کیویں عید منانواں
جیرھی بھوئیں دے بھاگ وکاون لوک ہنڈاون مونجھاں
جیرھی بھوئیں تے تریہہ توں مردین کئی لاوارث کونجاں
میں اوں بھوئیں دے نوحے لکھاں یا میں گیت سُنانواں؟
کیویں عید منانواں سانول کیویں عید منانواں؟
جنھاں ایں دھرتی دا بوچھن کیتے لِیر کتیراں
اُنھاں دیس کوں گروی رکھ تے یار بنڑائن جگیراں
میں ایں حال تے چُپ کر جیواں، یا تیکوں پرچانواں
کیویں عید منانواں سانول کیویں عید منانواں؟
جتھاں دھی دے ڈاج دا وِپرا پیو مفلس کوں ہووے
جتھاں ماء وی دِھی دے سِر اچ چاندی ڈیکھ کے رووے
اُتھاں میں ڈس جھمراں پانواں، یا وت وین ولانواں؟
کیویں عید منانواں سانول کیویں عید منانواں؟
بھانویں پُھل جہیں چہرے تھی گن بُکھ توں یار کمانے
ول وی سچ ٻولن توں ڈردن دھرتی واس ایانے
میں جیندیاں لاشاں کوں رونواں، مویاں نال الانواں؟
کیویں عید منانواں سانول کیویں عید منانواں؟
غیور بخاری
No comments:
Post a Comment
Note: only a member of this blog may post a comment.