جدید پنجابی شاعری
یار بیلی سجن پیارے کتھے گئے
بیہنے سی جو رل مل سارے کتھے گئے
منجے ٹاہلی بوہڑ وی نظری آندے نہیں
کھوہ سی جیہڑے مٹھے کھارے کتھے گئے
کونڑ سنے گا کہانی کیہڑا پاوے گا
نانی دادی بال اوہ سارے کتھے گئے
کتھے ویلا ٹُر گیا کڈھیاں کھیڈن دا
کیڑے کارے پینگھ ہُلارے کتھے گئے
لُکنڑ میٹی نال جناں دے کھیڈنے ساں
اوہ ہانی میرے چن ستارے کتھے گئے
گُھگھو گھوڑے سانبھ سانبھ کے رکھے سن
کونڑ دسے کا گا انہاں دے بارے کتھے گئے
کاغذ دی اوہ بیڑی کتھے رڑھ گئی اے
ساون رُتاں لیپے گارے کتھے گئے
رُت بسنت دی اجے تے ہونے ای ایتھے سی
گُڈیاں پنے چھت چوبارے کتھے گئے
نین جنہاں نے ساتھوں توں بازی جتی سی
نین جیہڑے سی ساتھوں ہارے کتھے گئے
بچپن گیا، جوانی ٹُر گئی ٹُردی جاندی اے
ما پے جائے ادھ وچکارے کتھے گئے
آغا جی کل لوکاں ساڈا پُچھنا اے
پھردے سی جیہڑے مارے مارے کتھے گئے
آغا علی مزمل درانی
No comments:
Post a Comment
Note: only a member of this blog may post a comment.