جدید پنجابی شاعری
جِہڑے پِنڈ اوہ وسدا
تکدی اے واء جدوں
پُھلاں وَلّے مُڑ کے
موتیے دے ہاسیاں چوں
ڈُلھدے نیں نِت جہڑے
ماندے نیں وٹاں بنے
گیتاں دے سرور نوں
چڑھ جاندے چاء کِویں
انبیاں دے بور نوں
نی جِہڑے پِنڈ اوہ وسدا
ہسدا اے چن جدوں
رُکھاں پِچھے لُک کے
مَٹھی مَٹھی چاننی چوں
پیندی اے پھوار جِہڑی
چھیڑدی اے اکھاں ویڑھے
سُتی ہوئی رات نوں
بُھل جاندے دُکھ سارے
ندیاں دی ذات نوں
نی جِہڑے پِنڈ اوہ وسدا
آؤندی اے سویر جدوں
کندھاں اُتوں لنگھ کے
چِڑیاں دے بولاں وِچوں
کِردی اے دھرتی تے
لیندے نیں سواد سارے
کھنڈ جہی مٹھاس دا
چنبے وانگوں کِھڑ پیندا
مُکھ موئی آس دا
نی جِہڑے پِنڈ اوہ وسدا
ڈھلدی اے شام جدوں
نیلے نیلے انبراں دے
مُکھڑے تے لالیاں دی
ٹھاردے نیں دِل لوکیں
ویکھ کے بہار نوں
گلیاں تے موڑاں دا وی
جی کرے پیار نوں
نی جہڑے پِنڈ اوہ وسدا
ارشاد سندھو
No comments:
Post a Comment
Note: only a member of this blog may post a comment.