جدید پنجابی شاعری
لگی اگ تے لارے کیہ کر سکدے نیں
پانی پون دے کارے کیہ کر سکدے نیں
دکھ دا مینہ تے پکے کوٹھے ٹہا دیندا
صبر دے مٹی گارے کیہ کر سکدے نیں
ہجر دی نیہری رات اچ تیریاں یاداں دے
ٹانویں ٹانویں تارے کیہ کر سکدے نیں
اپنا ویلا آپ ٹپاوناں پیندا اے
منگے ہوئے سہارے کیہ کر سکدے نیں
اپنی اگ اِچ سڑ جاندے نیں ساڈے جئے
اپنے آپ توں ہارے کیہ کر سکدے نیں
پیار تے توں ای توں دا سودا اے سجنا
ایتھے میں دے مارے کیہ کر سکدے نیں
اندر کُہپ ہنیرے ہون تے فیر انور
بجلی دے چمکارے کیہ کر سکدے نیں
منیر انور
No comments:
Post a Comment
Note: only a member of this blog may post a comment.