جدید پنجابی شاعری
ربا چپ کیتیا کی دساں، کیویں دساں
تیرے ایس جگ اتے کی کی بیتیاں
خواب میرے رڑھ گئے
نیند آلی بستی دے
راہ سبھے مڑ گئے
ہر پاسے پانیاں نیں
اپنی منائی اے
قبراں تے کائی اے
سوکھی کد نبھی ایتھے
رُل کے لنگائی اے
دینی کی صفائی اے
مک گئی دھائی اے
چُلہا پانڈے چارپائی
کج وی نئیں بچیا
چپ چاپ ویندا رہیا
ہائے او ربا سچیا
دھی نوں پڑھانا اوکھا
پڑھ لکھ جاوے جد
گھر وچ بٹھانا اوکھا
منڈے والے خواہشاں دے
ورقے تے وکدے
گھر والی دال روٹی
اتے کدوں ٹکدے
کی کی عذاب ایتھے دھیاں والے جردے
دھی گھروں ٹور کے تے روز ایتھے مردے
منڈے والے چوٹھے ہو کے
گل توں نئیں ہردے
لہو وچ ڈاہڈیاں دے ڈاہڈی
مغروری والا رس ہویا رچیا
ہائے او ربا سچیا
دل دے محلے وچ رولا کاہنوں مچبا
پیر تے فقیر ایتھے زر دے اسیر ایتھے
سپاں وانگوں ڈنگدے نیں ماں جائے ویر ایتھے
رانجھے پچھے رُل جاندی
کھیڑیاں دی ہیر ایتھے
ویلا جدوں ڈھلدا
ہوندی اے اخیر ایتھے
چنگا مندا بولدے مٹی وچ رولدے
فرش اتے بہہ کے راز عرش دے
کھولدے ذرا وی نئیں ڈولدے
ہائے او ربا سچیا سچ وی نئیں بولدے
راہ نئیوں لبھدی ہووے جیہڑی چج دی
ہر پاسے بیٹھے ہوئے ملّاں تے فقیر نیں
ٹُٹے ہوئے تیر نیں سارے نیں سوالی ایتھے
کلے اے امیر نیں
کنج دے اے پیر نیں
ہر ویلے کہندے مینوں
ڈاھڈا توں قہار ایں
حالانکہ میں سنیا جیہڑا تیرا بن جاوے
اودا تے توں یار ایں
ربا دس کی توں رحیم تے کریم نئیں؟
ایناں سارے اچیاں توں کلاں توں عظیم نئیں؟
الف لام میم نئیں؟
طور والے راہ اتے رکھ دا کلیم نئیں؟
ہائے او ربا سچیا
بلھا نئیں تے کی ہویا کتھے نئیں میں نچیا
پیار والی ہانڈی تھلے اگ نئیوں بلدی
ہنیری پئی چلدی
اچیاں دے نال
میری گل وی نہ رلدی
تن من ساڑ دی
موتوں پیلاں مار دی
باغ ایتھے کھو لیندے
جنوں چاہندے کو لیندے
اپنا قانون ایتھے
پانی ہویا خون ایتھے
عزتاں نوں لٹدے
ماریاں نئیں مُکدے
جمدی نوں مار دیندے
ویری ایتھے کُکھ دے
تپ وچ بہہ کے تذکرے کردے
اچے لمے رُکھ دے
کنوں میں پڑھاواں ایتھے
ورقے اے دُکھ دے
ہائے او ربا سچیا
رولے سارے پُکھ دے
یار احباب دا
پراگا وی تماشا اے
رونا وی تماشا ایتھے
ہاسا وی تماشا اے
دُکھ اچھا خاصا اے
جیڑے پاسے زر ہووے
ایناں دا او پاسا اے
لہو رہندے چکھدے
میرے کولوں پُچھ کے
تے راہ میرا ڈکدے
کہندے نیں حقیر ایں تُوں
نالے کیہڑا میر ایں تُوں
تیری گل منیے
ساڈا کدوں پبر ایں تُوں
میں تے مغرور نئیں
ہائے او ربا سچیا
تیرے کولوں دور نئیں
تیرے کولوں دور نئیں
ہائے او ربا
چپ کیتیا
ارشاد نیازی
No comments:
Post a Comment
Note: only a member of this blog may post a comment.