جدید پنجابی شاعری
ویلا بڑا ڈھاڈا جیہائے بھائی اج کل دا
لکھ پئے چارے کرو ایہہ نئیں جے ٹلدا
نہوندراں دے نال پائے مکھ تے چریہٹاں ایہہ
لگیائے سواد ایہنوں وکھرا ای کھلدا
اکھراں دے پچھے لکے دکھ بجھ لیندا اے
ہنڑ دس فیدہ کیہہ اے پھڑی تڑی گل دا
جاگو میٹی رہنڑ والا، ویلا لنگھ جانڑ تے
میرے وانگوں بیٹھا ہویا ہتھ پیا ملدا
وکھو وکھ سوچاں نیں تے وکھو وکھ عادتاں
کسے دا وی دوجے نال ذہن ای نئیں رلدا
بنھ تسنیم بنھے اکھاں اتے رڑھ گئے
ٹھل نئیں سکے ہڑ دل والی چھل دا
تسنیم عباس قریشی
No comments:
Post a Comment
Note: only a member of this blog may post a comment.