جدید پنجابی شاعری
ساڈے ول سوہنیا نگاہواں کدوں ہونیاں
دسو منظور اے دُعاواں کدوں ہونیاں
اک اک ذرے وچ رکھیاں شفاواں نیں
بوسے تیرے قدماں نوں دتے جنہاں رہواں نیں
ساڈیاں نصیباں وچ او رہواں کدوں ہونیاں
ساڈے ول سوہنیا، نگاہواں کدوں ہونیاں
ہجر دے بیماراں نوں شفاواں کدوں ہونیاں
ساڈے ول سوہنیا، نگاہواں کدوں ہونیاں
تِکھیاں جدائیاں دیا، دُھپاں دل ساڑیا
اینی گل دس دیو، خدائی دیا لاڑیا
دُھپاں کدوں مکنیاں تے چھاواں کدوں ہونیاں
ساڈے ول سوہنیا، نگاہواں کدوں ہونیاں
رو رو ساری عمر جدائی اچ گالی اے
ہُن ساڈی زندگی دی شام ہون والی اے
معاف ماہی ساڈیاں خطاواں کدوں ہونیاں
ساڈے ول سوہنیا، نگاہواں کدوں ہونیاں
عشق دے بیماراں نوں، دارو کوئی نی چاہیدا
ایہناں دا علاج ہے، دیدار سوہنے ماہی دا
عشق دے بیماراں نوں شفاواں کدوں ہونیاں
ساڈے ول سوہنیاں نگاہواں کدوں ہونیاں
آقاﷺ ایہو سدھراں نے سینے وچ پالیاں
ویکھاں گا میں کدوں روزے دیاں جالیاں
سجن اُتے تیریاں عطاواں کدوں ہونیاں
ساڈے ول سوہنیا، نگاہواں کدوں ہونیاں
محمد علی سجن
No comments:
Post a Comment
Note: only a member of this blog may post a comment.