جدید پنجابی شاعری
میرا دل ایہہ کہنداے پئی اوہ ماڑا نئیں
کرتوتاں توں جیہڑا لگدا چنگا نئیں
ایہہ سراسر دھوکاے سارا دھوکا اے
میرے چار چفیرے کوئی اپنا نئیں
دور دراڈیاں واجاں تے کن دھر لینداے
میرا ہاڑا کول وی رہ کے سُنڑدا نئیں
سجن انہاں ہر شے ویکھی جاندا اے
میں ای کول کھلوتا اونہوں دِسدا نئیں
کدی کدی دل کرداے اونہوں چھڈ دیواں
فیر ایہہ دل سمجھانداے حالی ویلا نئیں
اک دن سچ تے جُھوٹھ اوہدے تے کُھلے گا
حالی اونہوں شاید کجھ اندازہ نئیں
اونہوں یاد کراناے، رج اس دنیا تے
مجھ تے کھتری باہجوں کسے پچایا نئیں
تیریاں اکھیاں کیوں بھر آئیاں نیں تسنیم
میں تے اپنڑاں کوئی دکھ سنایا نئیں
تسنیم عباس قریشی
No comments:
Post a Comment
Note: only a member of this blog may post a comment.