جدید پنجابی شاعری
ڈاہڈھیاں مجبور ہن کٹھ پتلیاں مٹی دیاں
مرضی آلا نئیں منیندا مرضیاں مٹی دیاں
اوراں آ تینوں وکھاواں وقت دے ونجاریا
وینیاں سونے دیاں تے چوڑیاں مٹی دیاں
کینوس تے ہیریاں دی جھیل دا نقشہ بنا
دور بہہ کے ویکھ پریاں لاہندیاں مٹی دیاں
میں کدی کیتا اے ربا کوئی شکوہ نور دا؟
مڑ فرشتے کیوں کریندن چغلیاں مٹی دیاں
چل کسے جا ہور چلیے ایہہ اساڈا پنڈ تاں نئیں
وستیاں شیشے دیاں تے ہستیاں مٹی دیاں
تیرے مگروں وقت میرے نال انج کیتا دھروہ
دل سواہ دے وانگ رتاں ساریاں مٹی دیاں
ایہہ وسیم اکھیں جوں ہویاں لون وانگوں کھردیاں
ہور کتنی دیر تگسن پپنیاں مٹی دیاں
وسیم اکرم جوئیہ
No comments:
Post a Comment
Note: only a member of this blog may post a comment.