دل نال چا دل وٹوایو سے نہ تئیں سوچا نہ میں سوچا

 پنجابی سرائیکی شاعری

دل نال چا دل وٹوایو سے نہ تئیں سوچا نہ میں سوچا

ہک لحظہ دیر نہ لایو سے نہ تئیں سوچا نہ میں سوچا

نہ پیار وسرسے مردیں تئیں ہا خوشیاں وچ اقرار تھیا

ول قسم چا بھج تے چایو سے نہ تئیں سوچا نہ میں سوچا

ہے یاد اچانک مل پوّنا تیڈے نال تیڈے کجھ اپنے ہن

چا نظر ملا مُسکایو سے نہ تئیں سوچا نہ میں سوچا

میڈا وقت نزع تیڈا لنگھ آون کُجھ لوگ حقیقت جان گئے

جیویں رو رو وقت نبھایو سے نہ تئیں سوچا نہ میں سوچا

ارمان ہے نازش نکھڑن دا ہا سخت نکھیڑا محشر تئیں

نہ چھیکڑ دا مکلایو سے نہ تئیں سوچا نہ میں سوچا

صوفی نجیب اللہ نازش