جدید پنجابی شاعری
امبڑئیے نی
پتہ نئی کہڑی گاچی کھاندی رہی ایں
تُوں سانوں جمّن ویلے
ناں تیری کُکھ وچ ساڈیاں لتاں سِدھیاں ہوئیاں
ناں تیرے آہلنے ساڈا بھار سہایا
راتیں سونے آں
تے تیریاں ہڈیاں چُبھدیاں نیں
تیرا دودھ چُگھدیاں
جِبھ تے پوہلی دے کنڈے پُڑدے نیں
جِتھے توں تیلے جوڑدی رہی ایں
اوہ آہلنا بنان دی تھاں نئی سی
جس ڈھارے دے تھم نال
توں سدھراں ٹنگیاں سن
اوہ تے ہوا دا اک ہُلا وی ٹھل نئی سکیا
جہڑے شرینہہ دے پتر توں بُوہے تے ٹنگے سن
اوہ ڈاہڈیاں دے سِنگھ سنگھارن دے کم آئے
ہُن وال کھول کے
مُہاٹھ تے بہ کے شامیں وٓین ناں کیتے کر
آہلنیوں ڈِگے بوٹ
بیڑیوں ترُٹا پور
تے ترنجنیں وِچھڑیاں فیر نئی ملدیاں
تُوں تے بتی دھاراں دا مِہناں مارن جوگی وی نئی
طارق بھٹی
No comments:
Post a Comment
Note: only a member of this blog may post a comment.