پنجابی سرائیکی شاعری
منگویں سُکھ پرائیاں عیداں
نہ پُچھ کِنج لنگھائیاں عیداں
من مرضی دے چن چڑھا کے
سیٹھاں خوب کمائیاں عیداں
کاہدی عید جے عید دے چن وی
نھیرے وچ منائیاں عیداں
ساڈے دیس دے حاتم طائیاں
دِتیاں نہیں ورتائیاں عیداں
لکھاں عیداں توں ودھ ہُندیاں
پیکے گھر چوں آئیاں عیداں
ویڑھے سُنجے ہو جاندے نیں
جِس لے جان ویاہیاں عیداں
اُنج دی اک وی کر نہیں سکیا
ماں پیو کِنج کرائیاں عیداں
تگڑے پُت نوں لے کے دتیاں
ماڑے بس ویکھائیاں عیداں
اوہیو کھچ جہے گل نوں آئے
جِہناں دے گل پائیاں عیداں
کیہ لبھیا اے وکھ وکھ کر کے
اِک تھاں جمیاں جائیاں عیداں
کڈھ بہنا واں ہُن وی سندھو
پیٹی وچ لُکائیاں عیداں
ارشاد سندھو
No comments:
Post a Comment
Note: only a member of this blog may post a comment.