جدید پنجابی شاعری
دل تے بیتی لوکاں کولوں اسیں لکائی، دَسی نہیں
رات وہانی پیڑان اندر، نیند نہ آئی، دسی نہیں
سب توں اوہلے بیٹھ پروئی مالا ہنجوں لالاں دی
پلک پلک دی سوئی بنائی کیویں لنگھائی، دسی نہیں
پیار دے راہ وچہ یار دا خبرے کیہڑی جائی پیر پوے
ہر جا پھیری جھاڑو پلکاں بنھ بنائی، دسی نہیں
وختاں دے نال دل پھلواڑی عشق دے گھاء لکوئے نیں
ڈوڈِیاں وانگوں سو سو پرتیں پیڑ لکائی دسی نہیں
یعقوب آسی
No comments:
Post a Comment
Note: only a member of this blog may post a comment.