جدید پنجابی شاعری
اوہنے جو جو لکھے عشاق رکھن، اپنے کول تعویز بنا کے خط
خط دور کر لیندے نیں سینیاں دے، اپنے سینیاں نال لگا کے خط
اوہنے لین توں صاف انکار کر کے، میرے قلب شکستہ نوں چوٹ لائی
جیہڑا طرز طغرا وچ لکھیا سی، سو سو نستعلیقیاں پا کے خط
سر سبز میرے نامہ بر تائیں، مولا باغ جہان دے وچ رکھے
جان اپنی ہیل کے دے آیائے، سبز خط والے تائیں جا کے خط
بناں پچھیاں دسیاں جان گئے اوہ، کیہڑے آہو چشم نے یاد کیتا
میں کھولیا سامنے دوستاں دے، جدوں اکھیاں دے نال لا کے خط
اوہ میلن تے آگئے نے بسم اللہ میریاں بندشاں میرے مضمون میلن
پئے گمنام خط کی پڑتالدے نیں، میریاں خطاں دے نال ملا کے خط
پیدا دل وچ نویں گھبراٹ ہو گئی کدھرے اکھر ای غلط نہ پڑھے جاون
لکھیا گیا شکستہ دے وچ اوہنوں، میں جو لکھیا اج گھبرا کے خط
شروع ہوئی ناراضگی فضل اتوں سارے شہر دے نال ناراض ہو گئے
جس تے ثبت گجرات دی مہر ہووے، ردی وچ سٹ دین اٹھا کے خط
پیر فضل گجراتی
No comments:
Post a Comment
Note: only a member of this blog may post a comment.