جدید پنجابی سرائیکی شاعری
میں مونجھے دل دا مصرعہ ہاں
میڈے سامنڑے باہ
پہلے درد سمجھ
ایویں ترس نہ کھا
میں رو پوساں
میں رویا تاں
تیڈے تخت لاہور دیاں گلیاں کوں
میں تار سمندر کر ڈیساں
میں مونجھے دل دا مصرعہ ہاں
میکوں ہاں نال لا کے پورا کر
میڈا آدر کر
میکوں ورد بنڑا
میکوں گانویں ناں
میں آخری شخص ہاں دنیا ت
جیکوں عشق نچایائے گلیاں وچ
جیں جانڑ کے دھوکے کھادے ہن
اس پیار پریت دے رستے ت
جتھاں پیراں بھار وی اوکھا ہا
میں سِر دے بھار وی ٹریا ہاں
میکوں بھولا بھالا سمجھو چا
میکوں ہیرا پھیری نہیں آندی
میں یار دی یاری ڈیہدا ہاں
میں دھوکہ کھا کے ہسدا ہاں
میڈی پکی چنج مشہور ہیوی
میں پڑ ت مرن دا شوقی ہاں
میں مونجھے دل دا مصرعہ ہاں
میکوں ہاں نال لا کے پورا کر
میڈا آدر کر
میکوں ورد بنڑا
میکوں گانویں ناں
ذرا جلدی آ
جہڑی نفرت بنڑدی ویندی ہے
اے بھا مسما
کوئی حیلہ کر
میڈے جنگلاں کوں
میڈے صحرا کوں
کوئی آس امید دا خواب ڈکھا
انھاں راہ ت بیٹھے لوکاں کوں
کوئی ولدا ڈے
میڈے سارے سجھ تیڈی قید ءچ ہن
میڈی رات اماوس والی ہے
میڈے چندر ولا میڈی رات مکا
میں مونجھے دل دا مصرعہ ہاں
میکوں ہاں نال لا کے پورا کر
میڈا آدر کر
میکوں ورد بنڑا
میکوں گانویں ناں
خالد ندیم شانی
No comments:
Post a Comment
Note: only a member of this blog may post a comment.