جدید پنجابی شاعری
دھڑکن اوہدی واج تے رکھنی پیندی اے
پیار دی اینی لاج تے رکھنی پیندی اے
عشق نوں سوکھا کارا سمجھن والیا سُن
دھون وی لاء کے تاج تے رکھنی پیندی اے
دِھیاں وسانا ایڈا سوکھا کم تے نئیں
اپنی انخ؟ وی داج تے رکھنی پیندی اے
سَجی اکھ نال اپنیاں لوڑاں ویہنا واں
کھبی اکھ محتاج تے رکھنی پیندی اے
اوس غزل توں جاندی جان گویّے دی
جس دی طرز کھمّاج تے رکھنی پیندی اے
اپنے آپ نوں جے کر ٹھیک نہ کرئیے تے
انگلی فیر سماج تے رکھنی پیندی اے
ٹھیکری پہرہ پِنڈ وچ لگے جد تنہا
بوہتی اکھ الحاج تے رکھنی پیندی اے
محمد عمران تنہا
No comments:
Post a Comment
Note: only a member of this blog may post a comment.