جدید پنجابی شاعری
بہہ جا راہ وچ یار سجن دی
ریجھاں لاہ لے تک سجن نوں
بہہ جا راہ وچ یار سجن دی
ڈاہ کے چرخہ یار گلی وچ
کت لے تان توں یار سجن دی
یار گلی گلزار کہاوے
خُشبو لے جدوں لنگھ سجن دی
وکھ وکھ رکھ کے پیڑی ڈوراں
اکھٹیا کر توں تانگھ سجن دی
ککھ کولوں وی ہولا توں ایں
ہر نہ جاویں یاد سجن دی
سر تے پاویں پُھل مسل کے
چُنی لے کے رنگ سجن دی
سِکر دوپہرے ننگے پیری
نِیر بُجھاون پیاس سجن دی
لہو دا پیالہ پیش وی کر کے
کھلو قطاری چانگھ سجن دی
عشق نمازاں نیت کے جھلیا
پریت توں من وِچ واڑ سجن دی
ہولا ہولا راگ الاپیں
چھڈ نہ دیویں بانگ سجن دی
دھو لے اندر باہر توں من نوں
چڑھ جاوے جے ونگ سجن دی
خیال توں رکھیں ادب دا کینڈا
لے نہ جاوے سنگھ سجن دی
شیخ جواد حسین
No comments:
Post a Comment
Note: only a member of this blog may post a comment.