جدید پنجابی شاعری
پہلا پہلا پیار کِسے دا
رُس نہ جاوے یار کسے دا
یار نئیں رُسیا ہسدا وسدا
لُٹیا اے سنسار کسے دا
بے وفا اج تیرے پاروں
ہے گریباں تار کسے دا
اس بے فیض محبت کر کے
اُجڑ گیا گھر بار کسے دا
نئیں دسدا مُڑ کچا پکا
ہووے جے کوئی پار کسے دا
ہووے ویر تے بھاویں سجن
کرئیے ناں اتبار کسے دا
مُچھ نوں تاء اے دیندا ظالم
لُٹ کے ہار سنگھار کسے دا
عزت نال تاں ہے ہُن راہناں
شہر تیرے دُشوار کسے دا
سارے لوگ دُعا نئیں دیندے
سہہ کے وار ہر وار کسے دا
عام بندہ تاں کر نئیں سکدا
ایہہ کم ہے فنکار کسے دا
جِناں گُوڑھا سجن ہووے
کوئی نئیں چیندا بھار کسے دا
رازق جس نُوں جتنا دَیوے
توں نہوں پالنہار کسے دا
موت کسے دی ہے بامقصد
جینا وی بے کار کسے دا
نئیں قصیدہ لِکھیا جاندا
میتھوں بد کردار کسے دا
اس حساب اے لینا ساغر
رب نئیں رشتیدار کسے دا
ساغر ہاشمی
No comments:
Post a Comment
Note: only a member of this blog may post a comment.