جدید پنجابی شاعری
تینوں واسطہ رب دا رس بیلی
دکھ سہن توں ہو گئی بس بیلی
جے تُوں ای منہ اے بنائی پھرنا
کیہ زندگی دی فر چس بیلی
سٹ گئے نے بھرا کھوہ وچ مینوں
انج ڈبدیاں چھڈ کے نہ نس بیلی
اگ نفرتاں دی دل ساڑیا اے
بَن پیار دا بدل وس بیلی
میں قید غماں دی وچ پھسیا
تُوں ہور نہ رسیاں کس بیلی
فر ساری حیاتی ناں بولیں
ہک وار تے غلطی دس بیلی
ایہہ جال شریکاں لایا اے
کر ہوش نہ اینویں پھس بیلی
اوہ وقت رواندا اے عابد
ملدا سی جدوں ہس ہس بیلی
عابد علی عابد حافظ آبادی
No comments:
Post a Comment
Note: only a member of this blog may post a comment.