جدید پنجابی شاعری
لے وے بس مہینوالیا بس ہو گئی تینڈی مینڈی بس مہینوالیا وے
دس کیہ میرا وس چلدا اے پئے گئی ظالماں وس مہینوالیا وے
کرسیں کیہ گُجرات دے وچ رہ کے جا وطن نُوں نس مہینوالیا وے
ساڈی عُمر دی آس اُمید ساری لئی ظالماں کھس مہینوالیا وے
دساں جا کے دِلے دا حال کہنوں دس تُوں ہی دس مہینوالیا وے
وسدے شہر وچوں لُٹی جاوندی اے تیری سوہنی بیکس مہینوالیا وے
نزع وقت بیمار تے پہنچ کتوں تیرے مُکھ دی تَس مہینوالیا وے
موئی ہوئی وی سر کمہیاریاں دے گڑا جاوساں وس مہینوالیا وے
جے میں جان دی ویریاں دغا کرناں لاندی رج کے وس مہینوالیا وے
ہائے ہائے کویلڑے سار ہوئی ہوئی آں سخت بے بس مہینوالیا وے
کِتوں بن کے نُور تے دے آ کے ڈولی وچ عکس مہینوالیا وے
نئیں تے روندی چووندی نین رہساں بھر بھر بس بس مہینوالیا وے
فانی دنیا سمجھ فنا منزل ایہدے وچہ نہ پھس مہینوالیا وے
چلو چلی آواز سراج دیوے دم دم جرس مہینوالیا وے
میاں سراج الدین سراج قادری
No comments:
Post a Comment
Note: only a member of this blog may post a comment.