جدید پنجابی شاعری
جے دُشمن نُوں مار نہ سکدا آپوں مویا ہوندا
سپ اندر جے زہر نہ ہوندی سپ گنڈویا ہوندا
اِکو ساہے کر سکدا جے چیتا لمّاں پینڈا
فِر جنگلاں دا حال وی شہراں ورگا ہویا ہوندا
جے بندے نُوں دِس پیندی غیبت دی اصل حقیقت
موئے وِیر دا سِیخاں دے وِچ ماس پرویا ہوندا
نِیندر تیری وی اُڈ جاندی برساتاں دا سُن کے
محل تِرا جے میرے کوٹھے وانگوں چویا ہوندا
اوکھا پینڈا کرنا پیندا تینوں کاہلی کاہلی
کھبّے سجّے کھائی ہوندی، آگے ٹویا ہوندا
میں اوہدے ول تکیا وی نئیں قسم چوا لے میتھوں
دِلا! تینوں سبھ کُجھ دسدا جے کجھ ہویا ہوندا
تیرا ہِجر ہنڈایا کِھڑ کِھڑ ہسں کے لوکاں اگے
میری اکھ وی گِلی ہوندی میں جے رویا ہوندا
رانا سعید دوشی
No comments:
Post a Comment
Note: only a member of this blog may post a comment.