جدید پنجابی شاعری
ساڈے پڑھے لکھے بیکار رئے
تیرے ان پڑھ وی سردار رئے
ساڈے بچے گِروی رکھے گئے
تُسی کھا کے وی حقدار رئے
سانوں قبراں لئی نہ تھاں لبھی
ناں بالاں لئی روزگار رئے
ساڈے بی اے پاس وی رُلدے پئے
تیرے مڈل وی تھانے دار رئے
جیہناں جنگ کدی ناں جِتی سی
اوہ تمغیاں دے حقدار رئے
ایتھے ڈاکوں ہتھ حکومت سی
تاں چور وی منصبدار رئے
اسی احمد خاں تے بھگت سیاں
ساڈے سر حاضر ہر وار رئے
ساڈے بچے وی ہوئے اغوا
ایتھے حاکم جو خرکار رئے
جیناں غیرت عزت ویچی سی
اوہ ایتھے عزت دار رئے
جو مخبر سن انگریزاں دے
اوہ ساڈے تے سردار رئے
ہر ثالث دی اک قیمت سی
سب وِکدے وچ بازار رئے
اس دیش دا سید واسی آں
جتھے چور ای چوکیدار رئے
جمیل حسین سید
No comments:
Post a Comment
Note: only a member of this blog may post a comment.