جدید پنجابی شاعری
پاگلاں نوں سمجھان نہیں ہوندا
دِل دے اندر وَسن والا
سجن اے مہمان نئیں ہوندا
چوکھا رزق وی جوڑ لوّے کوئی
باجھ نصیباں کھان نئیں ہوندا
ایہہ تے آنی جانی شے اے
دولت تے کوئی مان نہیں ہوندا
لِسیاں اُتے زور آزماوے
اوہ گھبرُو جوان نہیں ہوندا
پِڑ وچ ڈٹ کھلو نہ سکے
مانواں دا او مان نہیں ہوندا
جس وِچ کوئی سچ نہ ہووے
ویلے دا او اکھانڑ نہیں ہوندا
لِیراں لِیراں جو ہو جاوے
او کپڑا فیر پان نہیں ہوندا
جس جائی وچ قدر نہ ہووے
مُڑ مُڑ اُتھے جان نہیں ہوندا
عاجز ایہہ گل پلے بنھ لے
پاگلاں نوں سمجھان نہیں ہوندا
محمد یوسف عاجز
No comments:
Post a Comment
Note: only a member of this blog may post a comment.